Vanka san zaša 

malo friške arije uzeti, 

malo se prošetati, 

na doma pensati, 

u sebi i na glas 

sa sobon kušeljati. 

Korak po korak, 

dub za dubon, 

lisa za lison, 

litrat za litraton, 

pensir za pensiron, 

jeno – drugo 

iz largega zove. 

Nebo se sve više kaliva, 

sve je škurije, 

sve mi se u tilu i glavi miša. 

Trisku za trisku trpin. 

Šajeta za šajeton 

u meni hita. 

Okolo sebe gledan – ninega ni. 

Prid menon blatan put. 

Z livega boka – ovce, 

z desnega – krave travu pasu, 

breki largo u selu laju, 

petehi se jedan drugen javljaju 

i za kokošima spati gredu. 

Vrane i tići još okolo lete, 

po svoju se pominjaju i karaju, 

malo se fermaju 

i joped okolo lete. 

A ja, ja trudan pomalo naprid gren. 

Škure oblake za sobon vučen, 

z ovcami i z kravami 

kakovu besidu hitan 

i na doma pensan. 

Sve više me je strah, 

ča će z mojima biti. 

U meni je počelo 

sve jače i jače grmiti. 

England, Lydbury North, tretega martišnjaka 1994.