Pismo materi


Mamo draga moja,

čuda je vrimena pasalo

od kad te nisan vidija,

z tobon se spominja i škerca,

z tobon za bankon sidija

i tvoju maneštru z gušton ija.

Nisan te ne, mamo moja draga

ja zabija.

Kamor kodar gren i

ča kodar da delan

vajka na tebe pensan.

 

Tvoje lipe modre oči,

tvoje najliplje lice,

tvoj blagi tepli glas,

tvoje beside,

tvoje srce i tvoju ljubav

u sebi čutin 

i od sriće plačen i mučin.

 

Draga mamo moja,

siguran san da i ti 

na mene pensaš

i da ti od svih ke iman,

najviše škrbiš kako je

meni vani u tujen svitu

i da vajka pensaš

kad ću se doma tornati

i za vajka z tobon ustati.

 

Mamo moja lipa,

viruj mi i ja

svaki hip na tebe pensan

i komoč  čekan

da ti se iz tujeg svita

doma u našu dragu Istru tornan.

Podijeli članak:

Facebook
Twitter
Reddit
WhatsApp