Šezdesetih lit

pasanega stolitja

na đardinima u Puli

bila su tri kioska.

U vnen na sridi korza,

priko puta farmačije,

črna, lipa,

vajka lipo obučena, 

lipo počešljana

i profumana divojčina Đina je delala.

Svi smo poli nje

đornale i druge pikulece kupovali,

samo da bi blizu nje bili.

Marineri i drugi soldati

u redu se čekali samo da je vide,

a imali su, vero, ča i viditi.

Đina je osim ča je lipa bila,

 i pametna bila.

Jako je do sebe držala,

 a posebno je pazila na

frizuru, dekolte, struk

i visoke take.

Svi smo je volili i sanjivali.

Đina je to dobro znala.

U škercu nan je znala reći:

Ča ste se fermali? Ča gledate? Ča nikada niste vidili

razbotunanu košulju ili kotulu?

Ča ne vidite kako je teplo?

U pravu si Đina moja draga,

okolo tebe, blizu tebe i

z tobon vajka je bilo teplo.

Čuda lit pokle tega je pasalo,

ma viruj mi,

vajka kada u Pulu dojden,

na Korzo pojden

u mladost se tornati

i na tebe i tvoju lipotu 

Đina moja draga pensati.