U špitalu u postelji ležin

i slušan kako vitar vani

svoje kante kanta.

U špitalu u postelji ležin

i kruz brkun gledan

kako vitar grane lela

i po nebu škure oblake

okolo pelja.

U špitalu u postelji ležin

i na moju dragu fameju,

na moje Šajine,

na moju Barbanštinu,

na moju prelipu Istru,

na moju Pulu, Poreč, Rovinj, Pazin, Labin

na moj lepi beli Zagreb grad i

na moje pretele  ja pensan.

U špitalu u postelji ležin

i više niš ne kapin.

Čujen li ja to zvona

da mi zadnji sinjal zvone

ili me to moja harmonika

i moje roženice

vanka iz špitala zovu

da naš balon gremo

z lipin divojčinami

po vitru zaplesati

i po našu zakantati.

U špitalu u postelji ležin

i Boga molin

za sve bone i zdrave ljude

na cilemu svitu.

U špitalu Sestara Milosrdnica 17.02.2021.