Labinjon Srećko Baštijanić

i Lidija z Kaštanjera u Puli

u Meriki merikanski sanj su dosanjali.

Svaka njin čast,

ma mi je jako ža

ča veliku žbalju su učinili.

Svoj čuveni restoran su

kako talijanski svitu prežentali.

U Felidiji san nikoliko put bija.

Vajka mi je lipo bilo,

jako dobro se je ilo,

pravo vino pilo

i po našu istrijansku

se je kušeljalo,

predikalo

i šoto voče kantalo.

Srećka, na žalost, više ni

z goru u naručje nebesa je partija.

Lidija je, fala dragen Bogu,

još živa, ma u glavu mi nikako ne gre

da se naša Puležanka z Kaštenjera

Talijankon prežentiva.

Njoj je demokratsko pravo

da bude ča će i ča je volja,

ma meni nikako u glavu ne gre

da se je mogla svojih korini odreći.

Ne znan ča bih na to reka,

ma moran reći da me to ne piježa.

HRT uredno emitira

seriju Lidijina kužina kako talijansku.

To je ta takova šporkeca da grže i veće ne more biti.

Mi Istrijani od vajka smo pravi i ponosni Hrvati bili,

Talijane smo od vajka štimali

ma svoje njin nismo nikada dali.

Lidija moja, ne zabi od kuda si,

čigova si i ke korine u sebi nosiš.

Neka te dragi Bog i Majka Božja čuvaju.