U vrime moje mladosti

jako je bilo u modi

onde u lasima imati.

Divojčine ke su ravne lase imale

permanente su si delale

i jako srićne su bile.

Svi su he gledali i svi su he falili,

a muški su he posebno rišpetali

i za njima munjeni bili.

Brkaste divojčine su to dobro kapile

i velike su se činile.

Denas su u modi drugašlje frizure.

Sve divojčine duge ravne lase

z kakovon ondon,

ala Melanija Trump sve imaju.

Vrime se je steši kambijalo.

Živi se munjeno i preveč grdo.

Denas je rivalo brkasto vrime

i teško da ćemo najti češalj

z kin ćemo ga moći zravnati.

Naše hrvacke brke i brkice

su tako spletene i zmotane

da će to brkasto vrime

poli nas, zgleda,

malo duže durati i

da ćemo ga z vakovon pulitikon

teško moći rasčešljati.