Sve je suro,
sve je škuro,
sve se kambijiva.
Vrtli, njive, korunali
i boške vištite
steši kambijivaju.
Magle i oblaki
sunce pokrivaju.
Dani su sve mrzliji,
kraći i škuriji.
Daždi sve gušče padaju.
Ljudi stare lumbrije popravljaju
i nove kupuju.
Vitri sve jače pušu i zavijaju.
Ljudi jakete, jaketone i blužone
si prontivaju.
Kampanju na sve riže ubajdivaju.
Na misto tega muški konobe i oštarije
sve gušće vižitivaju.
Žene, pak, svoje delo
u hižah i okolo hiž delaju.
Dica i mladi,
kako vajka
i svaderi po svitu,
samo na škerac
i na ljubav pensaju.
Neka he, neka,
neka se životu vesele.
Jesen je,
sve gušče okolo gnjišta sidimo,
drva ložimo,
kumpir na fete
na tavelah i spod čiripnje pečemo.
Lipo se po našu pominjemo
i starih lipih vrimeni se domišljamo